「侍產假一日都唔應該有！」呢句來自立法會飲食界議員張宇人嘅說話，可以話係近日引起公憤嘅一大金句，社會各界群起攻之，甚至連佢黨友都唔多撐，令佢成為全城箭靶。不過張宇人似乎唔覺得自己有錯，尋日重申唔會收回呢番言論，強調係幫業界反映心聲，就算佢係行政會議成員，都冇話唔可以同政府唔同意見，所以呢句說話完全冇問題喎！其實社會上已有共識要推行侍產假，差在係有幾多日，都唔知張係死要面，定係真心覺得自己冇錯，相信飲食業嘅打工仔聽見都心淡喇！
