政情：中風年輕化 黃思鴻都中招
無論係咩年紀，健康幾時都係最重要。工聯會尋日搞咗場心房顫動民間篩查大行動，喺青衣幫長者做檢查，以預防中風。以前喺工聯會做暑期實習嘅兩朵小花，現為工聯會社區幹事黃思鴻、陳安妮都有出席，黃思鴻話健康真係好重要，事關佢十八歲讀緊高中嘅時候都中過風喎！
中醫話邪風入體
黃話當時半邊臉癱咗，郁唔到，雖然中風情況唔係好嚴重，但諗番都覺得驚。之後佢先睇西醫做物理治療，後改為睇中醫，前前後後都醫咗成半個月。至於中風原因，佢話當時天氣凍，中醫師話佢冇好好保暖，導致「邪風入體」，所以自此大風嘅時候佢就要戴口罩，同埋定期做身體檢查。
陳安妮雖然冇類似經歷，但佢同黃一齊服務緊嘅大窩口比較多長者，所以健康議題都要跟得貼。佢自己每個星期都會跑步，不過就冇同黃一齊跑喇，事關黃鍾意競走多啲喎！