政情：工記三中佬遇困逆流而上

鄧家彪睇勵志片 感慨萬千

Bill尋日特意拉埋陸、何二人同黨友麥美娟一齊去戲院，睇一套近來爆紅嘅電影，內容講述幾個「高不成、低不就」嘅中年男人，加入龍舟隊後，竟重拾久違嘅衝勁，重新燃起鬥志，迎接人生一道又一道嘅逆流。

以前有划艇嘅Bill慨嘆話，扒龍舟同划艇雖有不同，但一樣着重團隊精神、節奏同毅力，直言坐得上去，只可以認清鼓聲，破浪前行，而套戲唔止勵志，更講述人到中年瓶頸，縱會失勢，碰上關口，都要勇敢同認真活一場。現年三十八歲嘅佢，上屆與黨友郭偉強齊任勞工界議員，郭轉戰港島直選成功，佢則未能再躋身議事堂，且盛傳下屆區議會要轉區，到底新一場選戰是危還是機？

陸頌雄何啟明 接棒鬥一番

至於現年三十九歲嘅陸頌雄同三十三歲嘅何啟明，兩人都係如日中天嘅年紀，下屆則要迎接直選洗禮。有指黨內老將黃國健做埋今屆就退休，九龍東一席就成為兩人嘅「救命草」，但何啟明本身係觀塘區議員，較任元朗區議員嘅陸頌雄有更大優勢，只要九東「兄弟」支持，何順利接棒機會就較高。

而一直有聲音欲推舉麥美娟轉戰俗稱「超級區議會」（超區）嘅區議會第二功能界別，咁新西一席就可以讓畀黨友。可惜，工記元老王國興都未能「戰勝」超區，麥美娟又係咪更有勝算呢？結果不言而喻，照咁講，陸頌雄就更加難再於新西插旗。

孔夫子開講有話「三十而立，四十而不惑」，人到三十歲就開始訂立人生目標，活到四十歲就唔會再感到困惑。唔知上述幾位「中佬議員」睇完戲會否悟出真理，解決人生困惑，準備明後兩年逆流而上呢？