中環出更：中學生模擬立會 區諾軒：小心被DQ
前年立法會換屆選舉時，有部分人因支持港獨而被取消參選資格（DQ），自此DQ事件偶有發生，香港眾志前常委周庭於今年三月參與立法會補選時，就因其主張民主自決而被取消參選資格。民主派立法會議員區諾軒尋日出席第十一屆香港模擬立法會活動時，就同中學生開玩笑話「因住畀人DQ」喎！
參加越野賽 呻同野豬無緣
話說尋日有中學生組成政黨，並模擬立法會開會情況。其中模擬參與廣深港高鐵（一地兩檢）條例草案委員嘅學生進行匯報時，提及該委員會通過嘅修正案，當中包括香港嘅人權法案應在內地口岸區維持有效。區諾軒其後提出指正，話《基本法》嘅權力係來自中國憲法，小心被DQ，更笑指「你哋大不敬喇」！
除咗出席上述活動，區諾軒尋日朝早亦同辦事處同事參加越野賽，由香港仔郊野公園出發，全長約八點四公里。佢話以前完成十公里馬拉松比賽需時約五十四分鐘，今次不足十公里路程卻花上超過一小時，自認成績唔好喎。佢又話，比賽期間有同事見到幾隻野豬，但因自己跑得較前，所以同野豬無緣咁話。
卓妮