中環出更：湊仔公黃楚恒出街食飯好頭痕
今時今日，父母生小朋友多數都係一個起、兩個止，生多幾個真係好罕見。早前南北行公所慶祝成立一百五十周年典禮，有五個仔女嘅香港中成藥商會會長黃楚恒（Stanley）都帶埋太太黃陳嘉妮同大女一齊現身。以為屋企小朋友多，做媽媽嘅一定辛苦過爸爸？未必，黃太就爆料話，Stanley湊小朋友仲辛苦過佢喎！
黃太解釋話，佢哋有四仔一女，當外出食飯時，多數要爸爸帶佢哋去洗手間，所以都係Stanley湊得辛苦啲，自己只需要照顧女兒就得嘞。Stanley就自爆，原本諗住生三個，點知第三胎係孖仔，諗住四個都夠晒啦，點知又意外有咗細仔，所以就有五個小朋友咁多。
講番典禮當日，多名商會代表、立法會主席梁君彥、新民黨主席葉劉淑儀及立法會議員邵家輝等人都有去，齊撐南北行公所呢個香港第一個華人商會。講起家人，邵家輝就話，自己結婚前已經相當識做，逢過年過節都會買定三套海味送畀外父外母同媽媽，佢又自爆自細身體唔好，相當容易攰，一直都要食中藥調理喎。
葉劉同南北行公所好有淵源
南北行公所主席李歡致詞時提到，南北行即係南線同北線嘅貿易地區，葉劉淑儀就諗起自己同南北行公所好有淵源，事關佢爸爸係新加坡華僑，其時做出入口貿易嘅代理，自己自細就跟住爸爸喺上環一帶打滾，對多間老字號酒家仲如數家珍添！難怪葉劉笑指自己應該加入成為「名譽會員」啦！
卓妮