政情：許智峯帶大女飛沖繩 影幼園畢業相
爸爸媽媽都好緊張子女成長，希望見證子女每個重要時刻，所以依家就算只係幼稚園畢業，幼稚園都會安排畢業嘅學生着晒畢業袍影相。育有一子一女嘅立法會議員許智峯（峯鴿）嘅大女今年幼稚園畢業喇，佢就帶咗大女去日本沖繩影畢業相。幼稚園畢業都咁大陣仗，唔知大學畢業會點呢？
順便滿足太太血拼願望
峯鴿話其實今次係五個家庭一齊去旅行，咁啱大女畢業，順便當係大女嘅畢業旅行，所以先至帶埋件畢業袍去影相留念啫！佢大讚沖繩係個好地方，可以同時滿足佢想帶仔女親親大自然，同埋太太去「血拼」購物嘅願望。而為咗畀太太放心去購物，佢就乖乖做湊仔公，喺太太去買嘢時負責帶小朋友去當地嘅公園玩。
見識過當地嘅公園，峯鴿就大嘆香港嘅公園太安全，保護措施做得太足，覺得沖繩嘅公園多設施，滑梯成層樓咁高嘅又有，玩一次都要幾分鐘，比香港嗰啲刺激好玩好多，而當地公園亦見到唔少港爸港媽帶仔女去玩，搞到佢都想返香港跟進吓公園設施問題，等香港啲公園都好玩啲咁話。