政情：施家殷投資睇好柬埔寨
講起柬埔寨，唔少人第一時間都諗起吳哥窟，或者其過往慘痛嘅歷史，但柬埔寨近十幾年已經起咗極大變化，好似扶康會副主席施家殷都認為柬埔寨已全面復甦，所以近年已有唔少人去咗柬埔寨投資。
陳昭昭話當地慈善業剛起步
施家殷廿幾年前曾去柬埔寨觀光，但佢自言當時政局啱啱平定，玩嘅時候仍然唔太放心，因為街上隨處見到持槍軍人，又會驚有地雷未清除好，所以都無諗過柬埔寨復甦速度咁快。佢認為柬埔寨局勢已安穩同太平，所以近年陸續有唔少投資者喺當地大興土木，再加上當地有賭業，佢就睇好柬埔寨嘅商業同娛樂事業，而現時已有地產考察團赴柬埔寨添！
幾日前由柬埔寨返港嘅柬埔寨中國文化友好協會創會主席陳昭昭，都認同現時係投資柬埔寨嘅低位，而當地嘅慈善事業亦都只係剛起步喎。
但講開地產發展，佢就話多數投資集中喺金邊，因為暹粒嘅建築物有高度限制，睇嚟有意進軍柬埔寨市場嘅人士就要多加留意喇。