政情：建制敲定 陳凱欣戰九西 硬撼劉小麗
立法會九龍西補選將於十一月二十五日舉行，距離選戰仲有三個多月時間，選舉工程已刻不容緩。盛傳被建制派推舉參加今次九龍西補選嘅食物及衞生局前局長高永文，日前宣布唔會參選之後，其得力助手、食衞局前局長政治助理陳凱欣隨即被指係高嘅「替代方案」。建制派消息指，建制陣營喺上周己決定由陳出選，認為佢係最適合人選，其他黨派亦將支持陳代表建制派出戰。陳一旦代表建制派出戰，將同因為立法會宣誓風波而被取消立法會議員資格嘅劉小麗打對台，兩女之爭真係要拭目以待喇！
對於九龍西補選，建制派對參選人選遲遲未有定案。一直被睇好嘅高永文上周終宣布唔會參選，原因就係評估過如果當選，將難以兼顧議會工作、臨床工作同其他義務工作。而早喺高正式對外宣布唔選前，政圈已流傳出身於電視台新聞主播嘅陳凱欣將會出選嘅消息，惟陳當時就不置可否。
最快下周游說各黨派支持
據悉，建制派喺上周決定由陳凱欣參選，並希望正式游說建制派各黨派支持佢。但由於正值暑假期間，部分建制派政黨高層都唔喺香港，所以陳最快都要下周先可以同各黨派去商量參選一事。而有關方面亦已向建制派各黨派嘅九龍西支部負責人下達指令，敲定由陳代建制派參與。雖然陳代表建制派參選嘅機會係好高，但仍然需需評估外界反應，再作部署。而陳尋日回覆本報時就話，對於係唔係參選，現時仍然係考慮中，未有任何決定。
二○一六年立法會換屆選舉，九龍西地區直選中當選嘅都係女將。今次當區補選，陳凱欣一旦出戰，料將得到與其喺政府並肩作戰多年嘅高永文支持，而早前新民黨主席、身兼行政會議成員同立法會議員嘅葉劉淑儀早前亦喺網上公開力撐陳，相信曾話過都有意參選嘅經民聯深水埗區議員梁文廣就會「收檔」，唔能夠成為今次補選嘅建制派代表，補選將成為陳同劉小麗嘅兩女之爭。如此一來，不論建制派同民主派最後勝利誰屬，九龍西都會再添一名女成員喇！