中環出更：蔣麗芸用肺做人 講嘢唔怕大聲
立法會議員蔣麗芸（Ann）經常喺議事堂中大聲發表偉論，佢就自爆有其他議會同事叫佢冷靜啲，小心高血壓喎。不過，佢尋日做完檢查，信心爆棚話唔怕高血壓，仲話講嘢大聲都唔使驚添！
心電檢測正常 嫌血壓低
阿Ann喺深水埗出席為長者進行心房顫動（房顫）篩查活動，期間更親身上陣進行初步心電圖檢測，兩次結果都顯示正常，並無心房顫動嘅風險，而且心跳頻率亦喺正常範圍。
佢話自己完全冇高血壓，反而嫌血壓低添，而自己心臟健康就全靠每朝帶愛犬散步行斜路作為運動，更話講嘢大聲亦有幫助，強調要同唱歌一樣「用肺做人」就唔怕聲沙。
佢又話香港每年有二萬人中風，當中有四分一患者因房顫而引起，認為要預防勝於治療，靠篩查減低長者中風機會，而用作篩查房顫嘅儀器並不昂貴，希望地區康健中心同各區門診服務都加入房顫篩查。
卓妮