中環出更：葉恭正唔識睇中文 影畀太太翻譯
香港雖然係國際金融中心，但如果唔識睇中文，生活上總會唔方便。五歲就移民加拿大嘅仁濟醫院副主席葉恭正（Paul）就係一個例子，雖然佢講中文好流利，連夾雜一兩句英文嘅毛病都冇，但原來佢只識寫自己個名同幾個數字。咁有冇試過鬧出笑話或甩轆？佢笑笑口話冇，不過每次開會時睇唔明中文文件，就要即刻影相畀太太隔空翻譯喎。
早兩日喺「海外學生仁濟夜」慈善餐舞會上，身兼大會主席嘅Paul上台致詞時用英文，以為佢係遷就現場嘅海外留學生，傾開先知其實係佢唔識睇中文，又唔想唔睇稿即場演講，所以就聽從太太建議用番屬於自己強項嘅語言。Paul話好彩科技愈嚟愈進步，好多時上網或用手機就可以直接翻譯，減少不便。
宓鴻宇拍住家姐做義工
今屆海外學生會主席宓鴻宇係新青會副會長吳聖傑太太宓琪其（Kiki）嘅姪仔，兩年前Kiki姪女、即宓鴻宇家姐宓甜鑫怡（Tina）都做過學生會主席，今屆Tina又重返做委員，拍住細佬一齊做義工。Kiki笑稱呢個年紀嘅年輕人正值反叛期，姪仔姪女咁聽話、咁識諗，覺得好欣慰，所以今個暑假佢都帶埋子女陪佢哋一齊揮汗做探訪、派福袋。早幾日一家人連同Tina去日本參加中日友好交流活動，當日下晝先至落機，雖然咁頻撲，但係為善事幾辛苦都值得。
仁濟副主席王賢訊同太太朱穎詩都有到場，佢哋仲捐出一幅已故功夫巨星李小龍畫像作慈善拍賣，幫仁濟緊急援助基金籌款。
卓妮