內地有城管，香港有食環，兩個部門都令一個城市變得醜陋。話說自食其力、六十多歲的拾荒婦蘭姐，在北角拉着手推車到附近商舖收集紙皮箱，期間把一袋包好的垃圾放地下兩秒，想再轉身返回手推車之際，突然閃出兩個穿着便服的食環署職員表露身份，兇神惡煞話要票控蘭姐在公眾地方棄置垃圾，要繳交罰款一千五百大元！
蘭姐話自己咁多年每晚都係喺度處理同分類啲垃圾，點會係製造同亂拋垃圾嗰個呀？她因手推車已放滿紙皮，原計劃待處理手推車的紙皮後，再取回該袋垃圾；可是，兩位阿蛇就是堅持票控，仲話叫佢上庭同個官講。每日身水身汗執紙皮，也不過搵百幾蚊，家陣一張告票就等如佢大半個月的收入，難怪蘭姐慨嘆：唔通真係我呢啲阿婆好蝦啲咩？
蘭姐一句無奈的感觸，道出基層市民的辛酸。「搵食啫，犯法啊？」就係！食環署回覆查詢時，更大條道理話任何人在公眾地方棄置垃圾均屬違法，法律面前應一視同仁，現時法例並無豁免拾荒者或長者不受檢控。一副「大公無私」的模樣，正義凜然到嚇死坑渠老鼠。之但係，有冇諗過「安民之道在於察其疾苦」，蘭姐自食其力不願成子女負累，佢拾荒維生本已夠淒涼，如今淪「垃圾蟲」！食環署諸君若有點人性，應畀時間佢處理垃圾，而唔係好似螳螂捕蟬咁。
事實上，食環署欺老凌弱，早已為千夫所指，食環惡過爛仔，雞毛當令箭的陋習，確實有必要檢討。對基層弱者大發官威，令香港這個本已沒有一刻安寧的城市變得更醜陋！有人指出，一個城市可以因為一些人一些事而讓人流連忘返，在那裏多停留一些時候便會感覺幸福滿足；同樣，也會因為城市的一些人一些事而令人想立刻逃離這座城市。香港已經有個「淫審處」是文明的恥辱，何堪再來個食環署成為城市冷漠的催化器？沒有溫度的城市，搵鬼住咩！