政情：畀細路瀨尿嚇窒莫樹錦拒做兒科
中文大學腫瘤學系系主任莫樹錦係本港腫瘤科權威，原來喺學醫嘅時代因為一件事而影響佢嘅發展路向。話說身為醫科學生嘅莫樹錦有一次要為一位小朋友進行身體檢查，當佢一解開尿片，冷不防遇到對方瀨尿搞到措手不及，經此一役，佢對兒科就耍手擰頭嘞！
投身腫瘤科發展
除咗呢個原因之外，再加上當時佢眼見癌症病人嘅存活率好低，治療方法又相當有限，於是佢就投身腫瘤科發展，將精力專注喺標靶治療嘅研究，期望藉此挽回更多病人嘅生命，結果努力多年總算略有成績。
雖然兒科並唔係佢嘅興趣範圍，但日前佢喺書展講述一種罕見病患，就連小朋友都聽得明白，睇嚟佢嘅專長除咗腫瘤研究，講故事亦都係高手。