政情：想做體育專員 牛下女車神棄奧運？
數年前拎過奧運銅牌嘅「牛下女車神」、香港單車運動員李慧詩（Sarah），今年初曾開腔話想衝擊二○二○年東京奧運會，不過佢突然開聲話想做體育專員，希望對體育有貢獻喎，唔通佢改變初衷，想要同現任體育專員楊德強拗手瓜？
讀課程先知早操好有用
其實Sarah今次係幫民政事務局拍宣傳片，當時被問到如果畀佢揀一份政府工會揀咩，Sarah就揀咗同運動員好有關係嘅體育專員，自言好認同體育普及化，又認為做運動唔一定要好辛苦咁做，細個時都試過跟媽媽去做早操，都係郁吓手同盆骨咁，當時以為冇乜用，後尾讀咗同健康有關課程，先知道早操對長者及大眾嘅協調特別好。
Sarah又話，體育唔單止幫到身體健康咁簡單，仲可以挑戰極限，訓練面對逆境時要有克服困難嘅心。Sarah未走入官場已經講到有紋有路，唔知楊德強對於自己嘅飯碗擔唔擔心呢？