政情：拍片教買年金 陳健波自己唔買
政府推出俗稱「自製長糧」嘅終身年金計劃，唔少長者都「十五十六」，唔知買唔買好。立法會財務委員會主席陳健波（波哥）都一連拍三條片教大家點樣買，仲着晒圍裙，揸刀切蛋糕，用cafe嘅形式講，相當生動，佢預告下一條片會教大家點樣「走精面」買公共年金，但佢自己就唔會買嘞！
波哥話政府推出嘅年金，適合一啲唔識投資、只係識得將錢放喺銀行嘅長者，所以自己就唔會買嘞！
仲預告下次教人「走精面」
講番條片，波哥近日推出嘅第二集，就係教大家分開幾次投資政府推出嘅年金，以抗通脹，加上如果一次過買晒，將來應急要中途攞啲錢出嚟，就會蝕三成。
有網民留言問，如果一百萬元買年金一半，剩番五十萬元，申請一啲長者福利時就會超出資格。波哥預告會喺下一條片教大家點樣「走精面」，避免超出資格，仲叫大家留意吓。