政情：立會秘書處蝦碌議案唔知過唔過
立法會嘅法案委員會審議延長男士侍產假嘅草案，尋日通過以委員會名義將工聯會何啟明要求政府喺延長侍產假後一年必須檢討日數嘅修訂，提交大會審議。話說去到會議尾，委員會主席黃定光（象哥）叫議員就何啟明嘅修訂進行表決時，秘書處就出現「蝦碌」，一時話何啟明嘅修訂獲通過，一時又話被否決。連象哥都話喺議會十幾年都未試過，「幾過癮」咁話。之不過，象哥都做過唔少法案委員會主席，冇理由都唔熟書，分唔清楚o架？
《2018年僱傭（修訂）條例草案》委員會尋日審議政府將男士法定侍產假由三日增至五日嘅建議。話說會議去到尾聲，需就何啟明及多名泛民議員提出嘅修訂進行表決。象哥就問何啟明係咪由委員會名義代佢提出修訂，何啟明就話自己係新人，唔多熟書，又話委員會提都好。象哥就笑笑口話「都要你願意先得嘅」，何啟明亦笑晒口答︰「你都係想聽我講我願意啫」。
象哥經驗唔少 仍然難分清
委員會否決咗多名泛民提出嘅將侍產假增至七日嘅修訂，再就何嘅修訂表決，結果喺泛民同建制派支持下，有八票贊成、六票反對、一票棄權，象哥隨即宣布通過由委員會代何啟明提出嘅修訂。點知兩名秘書處人員就喺象哥背後交頭接耳，之後象哥就話秘書提醒，佢雖然作為主席唔投票，但都係在席，所以何啟明嘅議案未獲通過。
正當何啟明以為變咗一場空嘅時候，象哥又宣布暫停會議五分鐘。秘書處多名人員就埋去同象哥「密密斟」，復會後象哥就話因為事務委員會同法案委員會及立法會大會規定唔同，事務委員會同法案委員會只計贊成同反對票，唔需要在席過半數，所以何啟明嘅修訂係獲得通過嘅。
尋日已經係立法會本年度最後一日嘅會議，真係估唔到咁都一波三折喇！睇嚟立法會秘書長陳維安都要做啲嘢，避免再出現呢啲蝦碌情況嘞！