中環出更：黃傑龍讚新鈔 明寸廿蚊張
金管局日前聯同三間發鈔銀行公布二○一八年新鈔設計，五大主題均具有香港特色，其中廿蚊鈔票更以飲茶文化為題。稻苗學會會長黃傑龍對廿蚊鈔票嘅設計非常喜歡，仲話飲食業感到非常榮幸，又喺Facebook發文，仲話相信立法會飲食界議員張宇人會因為新鈔而特別開心添！眾所周知，張宇人有個花名叫廿蚊張，唔通黃傑龍係寸佢？
點解張宇人會特別開心？事關要追溯至二○一一年最低工資實施前，當時張宇人提出將法定最低工資訂喺時薪廿蚊，又話呢個金額對企業「殺傷力不大」，隨即被諷刺為「廿蚊張」，呢個花名到依家仲不時攞番出嚟講。
張曾希望廿蚊紙有自己頭像
當年張宇人「廿蚊論」一出後，亦曾被改圖宣傳，將佢頭像印喺廿蚊紙上。事隔多年後，佢喺舊年曾指自己因此對廿蚊產生咗特別嘅親切感，甚至希望有一日廿蚊會印上自己嘅頭像。雖然新廿蚊新鈔並冇印上佢嘅頭像，卻以其界別為主題，相信都應該滿意嘅，所以黃傑龍先咁講啫！
卓妮