中環出更：何許穎嘉唔怕校服致癌教着靚底衫自保
消委會早排驗出兩款校服含有過量可致癌嘅有害物，嚇到全城家長震騰騰。香港工業總會（工總）早前舉行周年大會，卓妮捉住工總青年委員會執行委員何許穎嘉（Candy），問佢擔唔擔心問題校服，皆因佢係新手媽媽，小朋友今年一歲多。但Candy就笑稱，唔太擔心，因為媽媽教落一定要着底衫，所以BB都一樣要着。
Candy話面衫唔一定要好講究，相反底衫就要摸清楚，睇吓係用乜嘢物料、產地喺邊度，因為內衣係最貼身嘅衣物，如果物料有問題好易透過皮膚吸收。佢自爆好怕加入好多人嘅群組，因為入面一人一句太多資訊，而且有啲仲流流哋。試過有唔太熟嘅朋友問佢，知唔知BB衫有冇螢光劑，唔知就攞晒啲衫去化驗，Candy笑稱「邊驗得咁多啊」，所以都係揀件靚底衫最重要。
講起校服，工總主席郭振華覺得一班人着同樣制服行出嚟好型、好威，特別係名校生，依家佢出席團體活動都會盡量打番相關嘅領呔。至於今次嘅問題校服，佢話早排紅色染料缺貨，猜疑係咪有人用咗啲舊染料出事，但強調同業內冇人咁做，教大家將套校服洗多幾次就好啲。
查毅超認為港府應規管
工總副主席查毅超嘅小朋友都幾歲大，佢就話唔擔心得太多，反指外國品測做得好，對染料有規管，認為港府應該行多步，做好呢方面嘅工作。立法會紡織及製衣界議員鍾國斌都好認同，但就戲稱好多嘢都會致癌，如果家長真係好擔心就丟咗套校服喎。
卓妮