政情：丁新豹：繆斯女神「依依吟吟」變Museum
博物館熱潮席捲全球，每逢有特別展覽來港，都吸引市民大排長龍等睇，咁到底博物館係點嚟？博古通今嘅香港歷史博物館前館長丁新豹日前出席一個講座時就話，博物館英文「Museum 」中嘅「Muse」係古希臘女神繆斯，而繆斯女神主管音樂、史詩、歷史等，咁繆斯喺度「依依吟吟」，就變咗「Museum 」喇！又幾搞笑喎。
以前動物園都算博物館
丁新豹又解釋博物館嘅定義，話一九四六年時，國際博物館協會認為只要係公開，展覽又講及藝術、技術同科學等就定義為博物館，不過就應該無人知，當時連動物園都納入為博物館。及至○七年時，博物館定義又變為非牟利、永久性、溝通同享受，甚至係娛樂同休閒。佢形容現代社會顛覆咗過去對未來嘅睇法，將來可能所有嘢都變成虛擬，連實實在在一座博物館都冇埋。