政情：馮海容「處女下海」同蛙后江忞懿鬥游渡海泳
年度盛事維港渡海泳將於今年十月舉行，每年都有唔少政界及體壇名人參加。今年政府問責團隊繼續有勞工及福利局局長羅致光「落水」，再加上兩名女將，包括第二次參賽嘅環境局局長政治助理區詠芷，同埋「處女下海」嘅商務及經濟發展局局長政治助理馮海容。體壇方面，就有香港「蛙后」江忞懿同前「世盃冠軍」黃鍇威，睇嚟將會有一場激戰！
「新世界維港泳2018」賽事全長一千米，起點及終點分別設於尖沙咀碼頭同灣仔金紫荊廣場公眾碼頭，為確保泳手安全，所有參賽者須符合大會訂下的參賽資格，如果冇泳總認可嘅過往相關紀錄，就要參與大會水試方可作賽。而大會亦將報名日期延至八月九日，讓更多市民有機會報名參與。據知立法會議員梁繼昌都會出戰，唔知大家有冇機會同有「立法會飛魚」之稱嘅議員鍾國斌一齊暢游維港呢？
