中環出更：細仔玩到冇影 張雅麗嚇餐飽
做父母最緊張小朋友嘅安全，已經係三子之母嘅菁英會副秘書長張雅麗早前出席菁英會新書發布會時講起，一歲多嘅細仔依家已經識開門，轉個頭就唔見咗，成日瞓醒唔出聲，佢突然發現唔見咗個仔，真係嚇死，搵搵吓先發現佢走咗去個角落玩咋！
張雅麗話新聞報道話一、兩歲嘅小朋友好多意外會發生，佢都相當小心，仲教路櫃要鎖上牆，因為小朋友好奇開櫃門，好易會唔小心整跌成個櫃o架！講起三個仔，佢都笑到甜絲絲，話三兄弟互相好錫大家，亦特別黐佢，搞到老公有啲呷醋話「都唔知點解啲仔係黐阿媽多啲」。至於副主席甄韋喬原來最近做咗爺爺，佢話孫女兩個多月大，好得意，同佢傾偈好似識聽咁，仲識笑添，佢希望孫女日後都可以做會員喎。
曾鳳珠難忘10號波接待嘉賓
講番今次嘅新書，係菁英會多名成員合作寫成，紀錄十年嘅經歷。常務副主席曾鳳珠就講起最難忘係去年就職典禮前夕，適逢遇上十號風球，佢哋當時要接待內地同海外嘅嘉賓，加上場地布置原本預備由內地運來港，但速遞公司同租車公司嗰日完全唔接生意，嗰刻好擔心會前功盡廢，結果幾乎動員所有會員幫手，喺安全情況下運送物品到會場，而自己一落咗風球後就馬上揸車去機場接嘉賓，覺得無論事隔幾多年，講番呢個回憶都好有趣。
主席莊家彬都話十號風球嗰次好難忘，當時要準備風球唔落嘅後備方案，亦聯絡製作公司，加錢訂大型LED螢幕等，又要聯絡到底海外同內地嘉賓係咪嚟到。
副主席黃麗芳就講起有次搞論壇喺會展籌備至凌晨十二點，會展要關門，差唔多趕佢哋走，成班主席團就要一齊砌backdrop趕工，好彩趕得切咁話喎。睇嚟十年嘅經歷，帶畀佢哋一份好感情喎。
卓妮