街坊悲嘆﹕大人唔好拖細路仔落水
【本報訊】「跌完一個又一個落嚟，嚇死我喇！」事發恐怖一刻，在華塘樓對開休憩處有不少街坊目睹慘劇，曾婆婆事後仍猛拍心口「定驚」，且直呼﹕「嚇死我，嚇死我！」她憶述事件時仍猶有餘悸，指稱﹕「見到個女人隻手流好多血，不停抖氣！」又稱兩母子在差不多時間墮樓。在旁女街坊聲稱，看見一個又一個落下，嚇得肝膽俱裂。居住華塘樓的麥先生稱，當時他正在休憩處閒坐，突然聽到「嘭」一聲巨響，「即刻飆過去睇，跟住見到一個女人瞓喺開面，個男仔瞓喺埋面。」他形容﹕「嗰個男仔好細個，嗰時仲識郁。」
籲政府增撥資源支援
另黃先生剛落街買食物途經現場，當時已見兩母子浴血倒地，形容現場氣氛緊張，「消防同警察都好着緊，佢哋（母子）好似仲有得救」，他又嘆道﹕「點都好，唔關細路仔事，大人唔好拖細路仔落水。」另有手抱着嬰兒的劉小姐則稱，希望命危的男童可以吉人天相、大步檻過，又指自己也湊着小孩，對事件倍感切膚之痛。
街坊陳小姐則感到十分惋惜，形容產後抑鬱的成因很多，估計其中或涉及經濟壓力，而事主需獨力照顧兩名小孩，相信亦承受巨大壓力。陳指事主「可能都唔知自己有問題」，建議家人應多加留意，若察覺親友遇上情緒問題便應立刻求助。同時，陳建議政府應增撥資源，加強社工培訓，讓有需要人士得到更適切的援助，形容「社署方面應該跟貼啲，如果每次出咗事先去講，係無補於事。」