政情：做冇殼蝸牛兩年半 傅曉琳終有議辦
今屆區議會自二○一六年開始，已經過咗一半任期，但離島區議員傅曉琳（Sammi）尋日先終於抽中喺屋邨開設議員辦事處，告別做「冇殼蝸牛」嘅日子。由於任期只剩下唔夠一年半時間，所以Sammi就話，要盡快完成裝修，把握時間用議辦喎。
用嚟放物資 繼續擺街站
由於抽唔到議辦，Sammi一直都係「冇殼蝸牛」，今個月初先終於有架印有佢個樣嘅車投入服務，以解決冇議辦用嘅困境，估唔到唔夠一個月就傳來好消息。佢又話，其實今次抽籤都好緊張，直言依家抽到都覺得好好彩。不過呢個議辦並唔係喺正佢嘅選區東涌北，所以喺換屆後，如果連任都有機會要交番出嚟，畀當區區議員用。
雖然已經有瓦遮頭，但佢就話都會繼續擺街站，一來因為街坊已經習慣咗，二來議辦同自己嘅選區都有一段距離，街坊要行遠啲先搵到佢。不過依家總算有個地方擺放物資，自己屋企就唔使再堆到一屋都係喇。