政情：唔止愛唱歌 楊立門寫埋懸疑小說
民政事務局前常任秘書長楊立門（Raymond）向來鍾意唱歌，唔止有「AO歌王」之稱，卸任後都不時表演，甚至開音樂會。最近佢又有新搞作，但今次就同唱歌無關，而係寫小說，仲要係一本同政治有關嘅懸疑小說添。
去年起出任中華廠商聯合會行政總裁嘅Raymond原來唔止鍾意唱歌，仲有鋪寫作癮，又話自細就鍾意閱讀懸疑小說，因為呢類小說好似同讀者鬥智咁，中間又留有伏筆，夠晒有趣味，日本作家松本清張嘅書就係佢鍾意睇嘅書之一喇。至於今次寫書，佢就話靈感嚟得好自然，加上離開熱廚房多時，冇喺政府工作時咁多掣肘，可以自由啲喎。
部分以政治人物作原型
今次Raymond本書以香港政圈為背景，佢坦言有啲角色係以本港政治人物為原型，但就只係拎部分特質再加工，費時畀人話佢影射人喎。不過佢又話，如果睇到尾，都會估到係寫緊邊個。被問到會唔會再繼續寫書，佢就話為要睇新書反應先再決定，仲反問「寫書唔使時間咩﹖」