政情：朱凱廸 選村長鯰魚效應 刺激村委做好啲
新一屆新界鄉郊代表選舉會在明年一月舉行，有傳活躍新界鄉郊地區發展嘅立法會議員朱凱廸，將牽頭聯同早前曾參選立法會建築、測量、都市規劃及園境界嘅南區區議員司馬文參選，分別出戰元朗八鄉元崗新村及西貢坑口檳榔灣村。雖然好多人包括朱自己都坦言好難贏，但十八鄉鄉事委員會主席梁福元就反而覺得朱有勝算，仲話朱當選可警惕其他村代表做番好啲村務添，莫非梁覺得會產生鯰魚效應？
朱凱廸喺元崗新村住咗六年，啱啱符合參選村長資格，但佢坦言好難贏，就算參選，目標都唔會放在輸贏之上，反而係想令鄉民對鄉委會、鄉郊代表選舉有多啲諗法。朱話社會上對鄉委會嘅印象都係講吓邊個係地主、邊個搞埋啲丁屋屋苑咁，直言呢啲諗法過時，反而鄉村有好多民生議題值得討論，例如垃圾處理、交通、老人照顧、山火等，希望參選可以刺激村民諗多啲、行多啲，唔好覺得「鄉委會？嘥氣啦！」
梁志祥指朱不成氣候
朱唔睇好自己嘅選情，反而鄉紳梁福元就覺得朱有勝算，仲話選舉公開公平公正，如果村民覺得朱適合做村長，可能會投票支持都未定。講到朱一直被視為反對派，梁直言完全唔擔心朱會搞亂局，指鄉委會有幾十人，憑朱一人之力都做唔到咩衝擊，仲話朱應該係聰明人，都唔會亂咁嚟，仲話如果朱真係當選，可以提醒或警惕其他村代表做番好啲村務，可以爭取番多啲支持咁話。梁嘅講法即係「鯰魚效應」，引入外來者競爭，令其他村代表做得更好。
至於立法會議員兼元朗區議員梁志祥就覺得朱凱廸不成氣候，因挑戰元朗區鄉村難度較高，反而沙田、西貢有啲村長都唔係太想做，變咗司馬文勝出機會較高。問到驚唔驚朱係想用鄉郊代表選舉試水溫，睇吓參選二○二○年立法會換屆選舉會否被取消資格（DQ），梁志祥話朱一向都「獨獨哋」，如果要DQ佢，選唔選村長都會被DQ。
司馬文回應本報查詢時冇話會唔會參選，只係話因為早幾日係鄉郊代表選舉選民登記截止日，所以有公開提醒村民要登記做選民。