政情：獄中工場冇禁煙 盧建民感奇怪
因參與旺角暴亂而被裁定暴動罪成判囚七年嘅盧建民，早排透過朋友喺Facebook專頁發布一封信，話自己依家喺赤柱監獄服刑，被安排負責製衣嘅工作。身為環保及主張禁煙人士嘅盧話，對工作嘅地方冇禁煙覺得不明所以，但就強調唔係挑戰懲教署嘅規定喎。
收到朋友信件眼濕濕
Facebook專頁「影攝食」前晚貼咗盧寫嘅信件，佢話喺獄中一切安好，收到唔少朋友六月份嘅信，感到高興，睇完信仲有啲眼泛淚光添！盧喺坐監前會去行吓山、執吓垃圾，係個環保 分子，難怪佢對獄中禁唔禁煙咁敏感。佢話對吸煙人士有容忍，但覺得喺禁煙嘅地方就唔應該食煙。佢亦提及非吸煙人士嘅苦況，例如聞到煙味會覺得十分難受，仲反問如果非吸煙人士因吸入二手、三手煙而搞到身體有事，係咪由吸煙人士負責呢？