中環出更：做兩年議員重10磅 陳沛然暑假減肥
今屆立法會會期已經收爐，加上未來兩年係選舉年，到時周身都唔得閒，所以唔少議員嘅目標就係趁呢個暑假出外旅遊充電，之但係醫學界議員陳沛然（Pierre）就會多一個目標嘞！係乜嘢？
Pierre係波牛，鍾意踢波鍾意到話自己係足球員，做醫生只係興趣。日前佢又以足球員嘅身份落場踢番場波，自言喺嗰場波射入咗一球，出咗幾球靚波，停波、傳球、走位，仲話逼和班後生仔對手添！好明顯Pierre覺得自己有氣有力，同班後生仔有得揮，但跟住又指隊友話佢肥咗，佢亦承認做咗兩年議員，肥咗十磅，跑一百米都慢咗一秒添！
被太太話營養不良
不過Pierre又話，太太話佢嘅體重同BMI（體重指標）終於正常番，以前太瘦同營養不良喎。唔係啩？平日睇佢瘦蜢蜢啫，又成日踢波，咁大運動量，唔係真係營養不良啩？既然BMI達標應該開心嘅，但Pierre話今個暑假嘅目標係減肥。又減？睇怕佢係想跑番快啲，但小心又變番營養不良啊！
卓妮