中環出更：飲咖啡唔過量 林宣武靠脷嘗
好多香港人每日都要飲番杯奶茶或咖啡提一提神，唔飲唔舒服。生產力促進局主席林宣武尋日出席國際金茶王大賽（港式奶茶）香港區賽啟動禮時，講起自己鍾意濃縮咖啡，由朝到晚飲十幾杯都冇問題，唔會瞓唔着，仲話冇得飲反而會胃痛喎！
林宣武笑指，如果飲得多，開始覺得唔舒服，條脷就會感覺到「咖啡好難飲」，嗰陣就知唔好再飲嘞。由於佢咁飲得，所以連奶茶都鍾意飲茶味濃啲嘅。
有「中國變形金剛之父」之稱嘅林亮、商務及經濟發展局副局長陳百里等人都有出席，仲做埋今次準決賽評判。
黃家和介紹沖奶茶機械人
主辦今次比賽嘅香港咖啡紅茶協會主席黃家和就介紹一部人工智能沖製奶茶機械人——金仔，佢話如果輸入唔同茶王嘅數據，金仔就可以模擬茶王嘅做法，沖到同茶王親手炮製嘅靚茶一樣，希望可將金仔推廣到不同嘅國家同地區喎！不過，佢都話機械人難以完全取代人手沖奶茶，因人手沖始終有感情嘅。
講起奶茶就唔少得配嘢食啦，林亮最鍾意一邊飲奶茶，一邊食曲奇同鬆餅，鍾意食鬆餅仲有一段典故，事關佢細個讀書時，爸爸識做西餐同西餅，仲教過佢整添！雖然依家已唔記得點整，但見到鬆餅就會食吓當係懷舊。至於陳百里就日日都會飲政府總部飯堂嘅奶茶，雖然間飯堂嘅評價一般，但陳百里認為杯奶茶其實唔差，有人話飲奶茶會「削胃」，佢笑稱連埋早餐食咪唔怕囉！
卓妮