世盃專版：4強波衫 全城熱搶

據No.7 Soccer Co.的店主林先生表示：「克羅地亞主客波衫都賣晒，好多球迷之前都覺得英格蘭過唔到瑞典嗰關，所以睇埋場波先買，英格蘭贏咗之後有好多人都上嚟買，最多人買係哈利卡尼！」

而Kitroom Sports老闆Kan透露：「法國我得番件童裝、比利時有加細同加加大、英格蘭仲有一件作客加加大，然後克羅地亞就得件作客中碼。」其實上述4支球隊波衫被炒至過千元，NTS Sports老闆Nicky坦言價格上升是因為貨量少：「法國賣晒，英格蘭好好賣，補貨返唔切，印字都開始冇晒。格仔軍波衫入貨都要去克羅地亞先有得賣，計埋運費同外匯，所以一定會貴。」

另外，出局球隊如日本、德國、阿根廷未受成績影響，其中日本因球員打出拚勁，成功俘虜球迷歡心，銷量更是不跌反升，惟球衣總銷量仍比不上去屆。