人哋去旅行去到盡，做嘢搏到盡，港府就加租加到盡。係呀，公屋今年又要加租嘞，仲要加到一成嘅上限水平，係連續八年第四度加到盡嘞，基層市民生活百上加斤，怎一個慘字了得。
係咁嘅，房署啱啱完成公屋租金檢討，根據統計，公屋租戶呢兩年嘅收入升幅接近一成二，喺現行機制下，租金水平會按照租戶入息變化而釐定，加幅以一成為上限，換言之，只要房委會通過，今年九月公屋就會加租一成，以去年十二月租金水平計算，上調金額為三十幾蚊至四百幾蚊不等。
咪睇加租最多都係幾舊水，好似唔係大數目，其實小數怕長計，何況住得公屋嘅多數係基層市民，一成加幅已經係好大負擔嘞。再講吖，今年加風四起，港鐵加價，兩電加價，連公屋都加價，市民唔吃力就假。正如立法會議員話齋，港府庫房滿瀉，唔寬免租金都算喇，仲要加租，擺明懶理民間疾苦啫。
當然喇，欲加之租，何患無詞，房署例牌藉口多多。署方話喎，公屋租戶近十年嘅整體收入增加八成八，但公屋租金只係上升五成三左右，仲話減免一個月租金會有十幾億元赤字。言下之意，加幅好溫和嘞，好體恤市民嘞，咪使旨意有寬免。好心喇，一個一年盈餘過千億、財政儲備過萬億嘅政府，肥到襪都着唔落，公屋作為基層房屋福利，仲要同市民斤斤計較，真係講出嚟都醜。關注團體就講得啱嘞，房署淨係計算租戶收入升幅，但就冇計算通脹，根本唔公平，官老爺知唔知呢兩年物價加咗幾多吖。
講咁多都係嘥氣，港府高官個個淨袋二、三十幾餅一個月，梗係唔當加租幾舊水係一回事，特首林鄭更加係連廁紙喺邊度買都唔知，點知基層生活幾咁艱難。最惡頂係，港府呢頭守財奴上身，同市民算死草，嗰頭就對南亞假難民大開水喉，一年使十幾億元眉頭都唔皺一下。手指拗出唔拗入，涼薄成咁，衰格成咁，仲講咩「一起同行，擁抱希望，分享快樂」吖，唔好咁虛偽喇。
話時話，公屋租戶雖然要捱貴租，但都唔及住喺劏房嘅無殼蝸牛咁悲慘。係人都知，劏房呎租拍得住豪宅，仲要危機四伏，連高官都話係不適切居所，之不過港府做過乜呢？唔止公屋供應大落後，連組合屋都係得個講字，社會要求當局提供租金津貼，林鄭又話驚刺激業主加租喎，總之乜都唔做就最好，有冇再廢啲吖。
冇計嘞，香港貧富兩極，既係富人嘅天堂，又係窮人嘅地獄，一班廢官淨係識翹埋雙手講風涼話，納稅人出錢養廢，真係大不幸！