政情：胡炎松話最毒春天避食河豚
日本人有食河豚（雞泡魚）嘅習慣，惟河豚具有毒性，故坊間又有「拚死食河豚」嘅講法。不過原來唔止日本人先食河豚，內地最近都興起喇。香港潮屬社團總會常務會董胡炎松早前出席一個有關烹飪嘅活動上就話，佢之前去內地，都有食過雞泡魚，仲教路話春天係雞泡魚毒素最高嘅時候，最好避免春天進食。
胡炎松話內地唔似日本，要攞到牌先可以劏雞泡魚，出售畀食客，佢之前喺內地食嘅時候，見到個阿嬸都係踎喺地下就咁劏，雖然係咁，佢都係膽粗粗試咗，都認真大膽。
好多人都話食嘢不時不食，好似春天啲魚好肉游得特別生猛，係咪呢個時候食就最好呢？佢就話食雞泡魚就唔好揀春天喇，因為春天係雞泡魚交配嘅時期，佢哋體內嘅毒素最高，而秋天就係佢哋毒素最低嘅時候，所以秋天食就好啲喇！
篤魚頭辨別毒嘅程度
佢仲教揀雞泡魚時可以用手指篤吓雞泡魚個頭中間，如果感覺軟稔稔就代表冇咁毒，如果「硬梆梆」就代表毒啲，咁就唔好食嘞！