政情：免費外訪名額落空 謝偉俊嫌自費貴
立法會會期嚟到尾聲，議員準備放暑假，但其實佢哋都唔係放足兩個月嘅，因為立法會議會聯絡小組委員會會喺九月中組團去英國倫敦同愛丁堡訪問，同當地議會交流兼了解英國脫歐情況，而為咗公平分配九個全費資助嘅代表團名額，委員會主席葉建源早排大洗牌，分咗七個組合，再由每個組合去決定代表，等啲獨立議員有多啲機會抽到免費名額咁話。
想去又讓畀人抽先
其中有建制派組合就包括咗工聯會陸頌雄、獨立何君堯同謝偉俊，佢哋前日抽籤決定邊個可以用免費名額外訪，謝偉俊其實想去，但就禮讓畀陸、何抽先，點知佢兩個都率先抽到，謝偉俊就落空嘞！雖然議員仲可以選擇自費參加，但係就要成六萬元，都幾貴o架！所以謝偉俊仲考慮緊去唔去。
都仲有一個方法嘅！事關立法會尋日出咗文件，會用免費名額外訪嘅議員只係得八個，仲有一個名額未用，秘書處講明有興趣嘅議員可以填補，謝偉俊真係想去而唔想畀錢嘅話，可以諗諗佢，但依然係要抽籤，所以佢可能要諗埋仲讓唔讓畀人抽先嘞！