政情：梁美芬開泛民綠燈盡快 KO不信任動議

民主派喺呢個星期以雙軌戰線出擊，今日內務委員會會議上，將會討論由民主黨（白鴿黨）胡志偉提出，要求下周大會會議准討論三個議員議案；另一邊廂，李國麟亦火速同慢必傾成交換辯論時間，將排較先嘅「研究制訂讓同志締結伴侶關係」調後，但必須獲得所有修正案動議人同意，包括新同盟范國威、民主派區諾軒同梁美芬；范、區二人已答應交換。

話會撐梁君彥 可免泛民指指點點

咁梁美芬又點呢？佢回覆查詢時話尋日下晝已通知李國麟同意有關調動。佢又話覺得冇所謂，想調就調，「理直氣壯」，點都會撐梁君彥，而且免得畀個藉口泛民去「指指點點」喎。其實喺今年三月，航運交通界易志明都有同批發零售界議員邵家輝交換議案辯論時間，當時曾經去信畀主席要求批准調動，相信今次亦會有相同操作，但梁君彥或避嫌轉交畀內委會主席李慧琼處理。

根據立法會最新議程，下周大會議員議案會先討論由白鴿黨林卓廷提出，要求引用《立法會（權力及特權）條例》調查港鐵沙中線醜聞，而排第二就係慢必提出有關同志嘅議案，依家則會變成李國麟提不信任動議喇！按本周同上周都有討論引用特權法嘅議案，就算建制同泛民要各自表述留紀錄，都可以喺數小時內完成審議，變相下周只要冇特別策略更改，好大機會可以辯論不信任動議，兼進行表決。

梁君彥上周先畀泛民鬧爆，企圖阻止開始辯論對佢嘅不信任動議，同屬黨友嘅梁美芬理應唔會「跣」佢，咁點解突然咁順攤？有建制派議員透露，不信任動議「點都要開」，只係早定遲，而下周係本年度最後一個會，形容「拿拿臨搞掂佢（議案）咪仲好」，而且經過暑假幾個月去消化，咩輿論都講完喇！嗰個議員又話由泛民提出調動，送一個順水人情畀佢哋，點計都係有利建制派。目前立法會由建制派主導，今次看似開綠燈放水畀泛民，其實內裏盤算更準確，只想盡快KO呢類負面輿論散播啫！