中環出更：西鐵沉降議案極速完會 激親鄺俊宇
西鐵線元朗站早前被揭發其架空路軌有兩座橋躉出現沉降，唔少當區市民都非常擔心，所以身兼元朗區議員、立法會議員鄺俊宇尋日喺立法會大會上動議休會待續議案，但市民擔心唔代表議員關心，個議案竟然傾咗唔夠半個鐘就通過咗，而且只係得鄺俊宇同街工議員梁耀忠發過言，之後得番運輸及房屋局副局長蘇偉文總結發言，結果喺三十六票贊成，冇人反對下極速通過。
不滿辯論「快過高鐵」
鄺俊宇事後都話，對於個辯論咁快完咗都好疑惑，好多問號，形容今次辯論「快過高鐵」，直言「激死」。點解唔點人數？佢解釋，梁耀忠發完言之後時間好少，電光火石間立法會主席梁君彥已經叫蘇偉文發言，結果就點唔切人數。
其實成個辯論過程期間，都只係得鄺俊宇同梁耀忠喺會議廳入面，其他議員一律冇影，包括身兼元朗區議員嘅陸頌雄同梁志祥，佢哋直到投票點人數先現身，唔知係咪因為對上一個議案冇點名投票，所以唔知道已經開始傾西鐵線元朗站沉降，結果就冇咗個發言機會。不過講到尾，如果鄺俊宇咁緊張個辯論，一早喺梁耀忠發言時就應該點人數啦！
卓妮