中環出更：外國練波需要胡兆康惡補英文
香港係國際都會，近日港人使用英語嘅習慣又備受關注，港人不時都要同外國人接觸，都發生唔少同英文有關嘅趣事o架。香港男子保齡球隊代表胡兆康尋日出席傑出青年協會舉辦嘅「明日領袖選舉2018頒獎禮」時，講起以前英文唔太好，最初到外國訓練時需要翻譯，笑指英文係「佢識我，我唔識佢咁」，有時對方講完，自己都唔識反應，仲需要打手勢溝通添！
胡兆康話以前試過休學一年準備亞運，之後再讀番書都覺得困難，由於讀書成績都唔係咁好，尤其係英文，佢後來都逐漸習慣起居飲食同打保齡嘅用字，加上有教打波，要同其他教練溝通，英文亦慢慢變好。佢認為小朋友學習最緊要係興趣，有興趣就會主動搵學習方式，依家佢都會問學生係咪真係鍾意打波，因為家長想小朋友學，同小朋友自己想學係好唔同，又教路用獎勵嘅形式會更吸引到小朋友繼續學習，例如「你呢個禮拜乖啲就畀你打」，咁小朋友會開心啲，亦冇咁容易生厭。
講起英文，考評局主席陳仲尼就講起一件趣事，佢九十年代試過帶美國嘅銀行家去內地，內地嘅部門首長通常叫書記，英文譯做Secretary，美國人就以為係秘書，就不太理內地部門嘅首長，以為其他人先係首長，不過依家就唔會嘞，大家都理解多咗。佢又話唔覺得依家嘅學生英文差咗，只係依家加強兩文三語，所以廣東話、普通話同英文都各自分攤咗，多元化咗。
高鼎國話做學生要有主見
曾留學美國嘅傑出青年協會秘書長高鼎國學英文時都有煩惱，佢話自己講開美式英語，試過上堂時，老師講英式英語，令到佢同老師互相以為係對方錯，有啲爭拗添，笑指老師都覺得佢有啲麻煩，鍾意發表意見，但佢認為做學生要有主見，先可以做明日領袖。
卓妮