職場與工地有不少化學品，日常工作務必小心處理。阿麗今日第一天到清潔公司上班，開工前向管工強哥報到。
強哥：「阿麗，你第一日返工，等我講解吓使用清潔化學品要留意嘅地方。你平時用化學品前，會唔會閱讀化學品標籤資料？」
阿麗：「有標籤嘅咩？」
強哥：「梗係有啦。我哋日常工作會使用及處理各種化學品，化學品嘅危險性包括有毒、有害、刺激、腐蝕、易燃、爆炸同助燃等唔同類型。若果使用化學品時出錯，例如有化學品意外溢出，知道點處理，就唔會構成重大危害。」
阿麗：「咁化學品對健康有乜危害呀？」
強哥：「千祈唔好忽視化學品嘅危害，唔小心使用後果可以好嚴重。欠缺有效安全措施，化學品危害可引致嘅意外包括火警或爆炸；釋放有毒有害嘅氣體、蒸氣、煙霧、氣霧或懸浮粒子，吸入後可能會引致職業性哮喘病或出現敏感及呼吸困難等。化學品亦可能濺出熾熱、腐蝕性或有毒液體，令人受傷、潰瘍、中毒甚至死亡；當中可能引起嘅急性或慢性病，甚或會影響下一代健康。」
阿麗：「咁我應如何正確使用化學品？」
強哥：「使用化學品時，要保持工作範圍空氣流通，並且依照使用指示，同時使用合適個人防護，例如眼罩、面罩、口罩、手套、圍裙等等。仲要記住唔可以混合不同化學品，想了解多啲，可以查閱化學品《物料安全資料單》。」
阿麗：「完全明白，唔該強哥！」
職業安全健康局
www.oshc.org.hk