政情：孫明揚入ICU 孫太：佢精神唔錯

教育局前局長孫明揚（孫公）於一一年患腎衰竭後，一直定期到醫院洗腎，早前因肺炎入ICU（深切治療部）治療。孫明揚太太孫鍾小芬證實事件，佢話入ICU係因為會照顧得比較好，強調孫公精神不錯，仲積極面對，應該好快會出ICU，孫公仲話出院後要搵歌唱老師練番條氣喎！

孫太話，孫公入院已有一段時間，由於年紀唔細，加上係長期病患，所以醫護人員都建議佢入ICU，至於仲有幾耐先至轉出ICU，就冇問清楚嘞，因為唔想畀壓力自己同醫護人員。孫太仲多次大讚醫護人員好好，覺得香港嘅醫療服務好好添！

孫太仲笑指，近期要照顧孫公，所以慳咗好多，最近都冇去shopping，佢又想孫公食得好啲，養好身體，依家都會煮好多有營養嘅嘢畀佢食，仲話要分享畀大家點樣煮有營養嘅食物畀病人喎！聽孫太語氣咁輕鬆，相信孫公都好快會好番，祝佢身體健康啦！