中環出更：保良局慈善粵劇晚會 眾高層反串登台
粵劇文化博大精深，女仔反串做男角都可以做得好出色。保良局早前舉行年度慈善粵劇晚會，一班董事局成員粉墨登場支持，副主席陳黎惠蓮同老公陳永錕兩人男女角色大調換，換上男裝嘅陳太做老公，當堂活潑晒，扮老婆嘅陳永錕女裝扮相就甚有福氣，兩人依然咁「郎才女貌」，佢哋仲有「仔女」撐場添！
陳太話，今次反串係想帶新鮮感畀大家，亦配合劇名「紅絲錯配」。陳永錕就笑笑口話希望「一生扮一次女人」，今次終於願望成真啦！至於前主席趙振邦夫人趙鍾月琼就反串扮兩人嘅兒子，佢仲好搞笑咁摸一摸陳永錕個肚，話佢仲有一個小朋友添！至於總理何許穎嘉就扮兩人嘅女兒，佢笑指自己一向係似媽媽多啲，今次終於係似爸爸多啲啦！
顧東華首嘗女裝滋味
連續多年化晒妝做埋大戲嘅總理顧東華，今次就一嘗着女裝嘅滋味。佢話最辛苦係束住腰間，終於明白女士們以前幾辛苦，要綁腰綁腳，加上佢怕熱，髮鬢位置一度甩咗啲添！生得好高大嘅總理湯振傑雖然係扮文生，但就着咗一對武生鞋，佢笑稱因為武生鞋先有佢嘅足碼喎。
副主席馬清楠去年曾經話考慮「參演」埋一份，今年終於找數，首次化妝做粵劇，見佢喺演出前好努力咁望多幾次台詞，好認真。今次呢套劇嘅台詞特別融入咗保良局，例如有句台詞就提到「保良局學院仲難入過西洋學堂」，認真威水。今次活動最終籌得逾二百四十萬元，用於支持粵劇發展基金及安老服務。
卓妮