政情：徐立之追科研債？楊偉雄：找咗數喇
好多大學校長曾經鬧爆政府喺科研嘅投資太少，培養唔到科研人才，仲窒礙咗科研嘅發展，而創新及科技局局長楊偉雄遇到香港大學前校長、港科院院長徐立之即刻話自己找咗數喇！找數？好似驚死徐立之追債咁喎。
已設兩平台 培訓人才
多名司局長呢兩日輪流喺Facebook上載短片，回顧過去同展望將來嘅工作，楊偉雄尋日就上載咗段短片，一開波就見到佢喺一個場合遇到徐立之，佢主動話「我找咗數喇」！講到欠債還錢咁，原來係徐立之曾經叫政府拎五百億元出嚟搞創科同科研，而楊偉雄就話依家已經兌現咗嘞！
之後楊偉雄就講到中央嘅科研資金可以「過河」，徐立之話兩地科研人才可以合作係好事，可以增加人才嘅流動，同時亦畀咗香港好大挑戰，而楊偉雄就即刻搶住話依家設立咗兩個平台包括醫療科技同人工智能，相信能夠培訓到更多人才，但徐立之就話希望愈高，壓力愈大。吓，潑楊偉雄冷水？咁又唔係，佢最後話有壓力先可以推動發展嘅。