政情：詹志勇過檔教大 即為校園樹把脈
有「樹博士」之稱嘅香港大學地理學系前講座教授詹志勇，尋日過檔香港教育大學，出任研究講座教授（地理與環境科學）。雖然佢未遷入宿舍，但就急不及待為教大校園嘅樹木「把脈」，佢話教大嘅樹木種類繁多，建議多種開花樹木，令校園環境更心曠神怡，佢仲笑言，若有需要，佢樂意充當教大顧問，就校園綠化畀意見添！
詹志勇話首個任務就係為教大社會科學周講座擔任講者，提升中學生對地理以及綠化環境嘅興趣，佢期望喺教大建立一個壯大活潑嘅研究團隊，爭取更多資源，作跨學科同跨院校研究。
將研究關注劏房戶問題
其實佢亦好關注劏房戶嘅生活環境，將透過問卷同儀器分析了解劏房戶所面對嘅生活問題，例如日照、濕度、空氣質素和通風等。佢慨嘆，香港作為大都會城市，物資條件理應相對豐富，無奈入住劏房嘅人卻愈嚟愈多，期望透過有關研究調查，令社會反思劏房嘅問題。
現年六十五歲嘅詹教授明言熱愛研究，從未諗過退休，又好開心得到太太支持，繼續學術工作。佢話未來幾個月需到海外出席學術會議，但若果情況許可，會安排與太太同行，爭取二人相處時間。