政情：組織狠斥青年宿舍目標錯
政府早於一一年提出興建青年宿舍，而首個動工項目將提供八十個宿位。不過，有政黨嘅青年組織批評青年宿舍計劃政策目標有問題，直言如果唔改善，不論興建幾多宿舍都唔能夠幫到青年，係現屆政府最需要改善嘅青年政策之一。
本末倒置 租金相對高
觀塘區議員、青年民建聯主席顏汶羽話青年宿舍唔係為解決房屋問題，而係協助青年作生涯規劃，認為政策目標錯誤、本末倒置，未能協助年輕人上車，而且租金相對高昂。
佢認為青年宿舍同公屋輪候關係未搞清楚，因為現時規定入住青年宿舍最多五年，仲需要取消輪候公屋資格，質疑年輕人好難喺五年之後變得有能力置業或租置物業。
顏汶羽促請政府將青年宿舍視為房屋政策，由房屋角度幫助年輕人，若繼續將宿舍納入民政事務局範疇會感到失望。
對於青年政策評價，該政黨認為政府於學業、置業、就業同參政議政亦有改善空間，冀當局多聆聽青年意見。