政情：今日你上鏡：立會興針織呔 鍾國斌呻難打

唔少立法會男議員都會着西裝返立法會，一條領呔可為沉悶嘅西裝加啲點綴。近日議會內嘅男議員都不約而同佩戴花肖嘅領呔，唔通咁樣開會醒神啲﹖本身從事製衣業嘅紡織及製衣界議員鍾國斌早前戴咗一條針織黃白色橫間領呔，仲話呢款呔夠晒特別，不過就呻條呔幾難打。而有過百條呔、返立法會幾乎冇重複嘅議員楊岳橋，亦都戴過一條紅底白點嘅針織呔。議員尹兆堅就話，自己都有呢啲款嘅呔喎。睇嚟針織呔已成為立法會男議員嘅潮流喇。