政情：做完矯視飛甩眼鏡 蘇錦樑呻唔慣
唔少人都覺得戴眼鏡係件麻煩事，特別係天氣熱流晒汗或做運動時就更加唔方便。一向「眼鏡look」示人嘅商務及經濟發展局前局長蘇錦樑（Greg蘇），尋日出席活動時冇戴眼鏡，真係少見。唔通佢跌爛咗副眼鏡？佢話係因為做咗手術，唔使再做「四眼」喇，反而呻話小學已開始戴眼鏡，依家冇咗副眼鏡反而唔慣喎。
Greg蘇自爆有白內障，兩周前做咗手術，仲順便矯正埋近視。醫生原本話可以選擇睇近嘢清楚或睇遠嘢清楚，本身有近視兼老花嘅佢就揀咗後者。依家佢嘅近視矯正咗，但睇近嘢時就要戴老花眼鏡。不過，佢話同太太都睇唔慣自己唔戴眼鏡個樣喎。
保留私隱 唔擺相上網
Greg蘇離開政府後返咗以前間律師行幫手，但唔會再執業，只負責搞公司形象工作。因為去旅行、探孫同種菜已經夠忙喇。
不過，佢太太就千叮萬囑，唔可以擺啲孫嘅相上網，家人都唔會上載有佢嘅相，要保留私隱咁話。