政情：雀仔盆栽築巢生蛋 李家仁話「好嘢嚟」
雀仔喺大樹上築巢就見過，喺屋企盆栽築巢、仲孵化埋雀仔BB就認真少見。唱兒歌《小明上廣州》唱到街知巷聞嘅兒科專科醫生李家仁，屋企露台種咗幾盆大型盆栽，仲惹來雀仔喺盆栽上築巢，仲生咗三隻雀仔蛋。三隻雀仔BB尋日朝早破殼而出，佢顯得好興奮。問到會唔會將雀巢移走，佢就話係「好嘢嚟」，梗係唔移走啦。
擺相機影低情況
李家仁話一、兩個星期前無意中發現露台柏樹盆栽上有個雀巢，內裏有一隻雀仔蛋，而一對雀仔耐唔耐就會飛入雀巢睇吓。因為佢怕打擾雀仔一家，於是好少去露台，但間中都會擺部相機影吓雀巢情況。至尋日朝早雀仔BB終於出世，佢先發現原來雀巢中係有三隻蛋，孵出三隻雀仔BB。李搵過雀仔嘅資料，話應該係紅耳鵯，佢仲問過堪輿學家李丞責，李師傅指雀鳥係好嘢，代表平安同喜慶，可防小人口舌是非喎。