政情：建制泛民互數人格
立法會主席梁君彥主持會議手法屢爆爭議，衞生服務界議員李國麟就此提出不信任動議，但梁前日主持立法會續會決定提早三個鐘收工，間接令到不信任動議無法喺暑假休會前辯論，再被炮轟。民主派尋日喺內務委員會上再提出質疑，當中民建聯陳恒鑌（Ben）反駁有議員連委員會主席都未做過，質疑冇資格批評，隨即辣（興）議會陣線朱凱廸，朱質疑阿Ben嘅人格，因而引起罵戰。
陳恒鑌：做得耐唔代表熟規則
事緣本周大會會議，原定喺審議「墟市事宜小組委員會報告」後，緊接討論由議員盧偉國提出有關「加快推動智慧城市發展」嘅議案，但梁君彥審議完墟市報告後就宣布休會。盧偉國、秘書處及內會主席李慧琼尋日分別喺內會解畫，話係諮詢過盧偉國意見後，梁為咗辯論嘅完整性先決定休會。但公民黨郭家麒就鬧爆成班建制派做嘢處事態度隨心，仲話自己做緊第三屆議員，從未聽過辯論完整性有幾重要，覺得匪夷所思。
阿Ben反擊鬧爆班民主派只係重視自己嘅不信任動議，仲反問佢哋係咪借咗聾耳陳隻耳，冇聽清楚秘書處解釋。同時，佢仲話有啲議員「做咗N屆，連主持都唔主持」，認為做得耐唔代表熟悉議事規則，唔知係咪講緊多次做「逃兵」嘅議會陣線梁耀忠。
面對自己友疑被抽水，朱凱廸隨即被辣（興），爆出一句「陳恒鑌係咩人格，大家都好清楚啦！」阿Ben嘅黨友周浩鼎就鬧朱凱廸侮辱。朱指無意侮辱，係效法運輸及房屋局局長陳帆喎。不過，佢講到一半就被熄咪，之後阿Ben唔執輸，引用番同一句說話，「朱凱廸係乜嘢人，大家都好清楚。」罵戰先至平息。
梁君彥唔止主持會議手法被質疑，專業議政梁繼昌亦要求討論梁應辭任所有受薪董事，被李慧琼拒絕要求。梁繼昌將會就事件去信梁君彥及議事規則委員會主席謝偉俊跟進事件，睇嚟梁君彥都有排煩喇！