中環出更：財會開會 陳健波斥官員嘥時間
立法會審批政府工程進度緩慢，立法會財務委員會尋日就開會審議政府多個工程撥款，財委會主席陳健波似乎都好心急。曾經開班教政府官員答問題嘅佢，又再喺會上鬧爆官員，批評佢哋回答議員提問時，答案唔聚焦，成日只係識講背景資料，仲叫啲官員唔好浪費會議時間咁話。
兜轉回答欠聚焦
話說財委會議程上仲有十幾個撥款項目有待審批，不過啲官員答問題時答案滿足唔到議員要求，會議進度就變得緩慢。陳健波都忍唔住批評官員，話議員嘅提問係合理，但官員回答欠聚焦，兜兜轉轉，係浪費時間，佢仲多次即場教埋啲官員點答問題，又一度索性要求官員喺會後再提交書面回覆畀立法會。
不過陳健波都唔係一味斥責官員，佢之後都有提醒埋議員，話議員同官員都要精問精答、短問短答，重申要聚焦同埋抓緊時間，直言「今日有十三個議程，唔好咁肉酸過得一個」。
雖然陳健波咁肉緊，但最後財委會都只係完成到兩個議程，包括消防處及海關兩個紀律部隊嘅宿舍建造工程，同埋運輸及房屋局開設職位以監察機場管理局工作嘅建議。
卓妮