立法會議事規則委員會主席謝偉俊近日提出再次修改《議事規則》，以懲罰喺立法會開會時被逐出會議廳嘅議員，當中包括罰「停賽」，即被逐後一段時間內唔准返回會議廳開會，甚至有建議多次被逐離場嘅議員，整個年度都冇得開會。
不過，有建制派議員坦言成年唔畀開會呢招「太絕」，會惹來批評，亦都擔心太耐唔畀議員開會，會令支持者覺得益咗班成日玩嘢嘅民主派，唔開會都有糧出喎，所以就認為罰「停賽」之餘，都要扣人工先得。
唔少建制派都認為「年度停賽」呢條「辣招」太辣，所以就有人建議如議員被逐，討論同一議程期間都唔可以返回會議廳。不過，部分具爭議性嘅議題需長時間審議，未必能夠在一、兩次會議完成，咁樣被逐嘅議員豈不是有排都唔使開會？所以究竟罰「停賽」幾耐，建制派都未有定論。
至於唔開會有糧出都係建制派其中一項關注。建制派中人透露，早前都有文件講過議員一年開幾多個小時大會，佢哋都徵詢過意見，認為扣糧嘅方法可以時薪計算。換言之以議員月薪九萬六千多元、每月開大會時間約為八十小時計，時薪為一千二百多元。議員每罰停賽一小時，就扣薪一千二百多元，聽落都幾甘，到時班民主派議員為荷包着想，可能真係唔敢再玩嘢喇！