政情：陸頌雄擘大對髀搞喊麥美娟？
立法會議員麥美娟（Alice）尋日淚灑立法會，而元兇竟然係黨友陸頌雄，當時陸仲要擘大對髀添，到底發生咩事呢？其實一切都係生得高嘅錯，因為身高逾六呎嘅陸頌雄，尋日同Alice一齊去俗稱「咪兜」嘅採訪位置作回應，由於陸高過Alice成個頭咁多，佢為咗收窄兩個人嘅身高差距，就擘大對腳接受訪問，陸一開聲就搞到Alice喺鏡頭面前爆笑，仲係笑到喊添！
C朗姿勢受訪 笑到抹眼淚
陸當時就即刻話，呢個姿勢同葡萄牙國家隊隊長C朗主射罰球時一樣喎。不過佢唔係着運動褲，唔怕弄巧反拙喺鏡頭前爆軚咩？最後笑到要抹眼淚嘅Alice就叫陸不如企番直個身，陸就稍為拍埋對腳，但對腳依然分得好開。至於Alice就花咗成分鐘先冷靜落嚟，重新接受訪問。
此外，民主黨議員許智峯早前在立法會大樓內強搶保安局女官員的手機，新民黨議員葉劉淑儀就此提出譴責議案，並交付調查委員會處理。立法會內務委員會尋日選出調查委員會成員和正、副主席，麥美娟、謝偉俊分別成為委員會的正、副主席，其他成員包括張宇人、張國鈞、謝偉銓、梁繼昌、郭榮鏗。