政情：衞生署副署長黎潔廉退休 女將接棒
衞生署管理層今年爆退休潮，現年六十歲嘅副署長黎潔廉尋日最後一日返工。黎潔廉喺一九八三年加入政府，同署長陳漢儀作風一樣咁低調，都係鮮有公開露面同接觸傳媒，大眾對佢所知甚少。接替黎嘅同樣都係一名女將，呢位新副署長就係現為衞生署私營醫療機構規管辦事處主任嘅趙佩燕，趙明日就會履新喇。
除咗黎潔廉，衞生署多個高層都已邁入花甲之年。據聞監測及流行病學處主任程卓端都係今年退休，佢本周二已開始休假，直至下周五，估計已經展開退休安排。而公共衞生服務處主任梁子超亦都到六十歲，應該都係今年退休。
管理層爆退休潮
另外，該署仲有七個助理署長都要搵定接班人，據聞署方正安排緊第二梯隊嘅人上位，以應付呢個退休潮，仲同時努力培訓緊第三梯隊，以免日後青黃不接。