政情：民主動力大蝦細 協調區選益白鴿友
由多個民主派政團及組織組成嘅民主動力，近年分別喺區議會選舉及立法會選舉擔當協調角色，但隨着民主派光譜變闊，民主動力就被質疑「圍威喂」益自己友，更被質疑有乜資格代表民主派。區議會換屆選舉明年底舉行，民主動力又再開始協調工作，但有人就批評佢哋想「空降」同民主動力召集人、民主黨（白鴿黨）東區區議員趙家賢同黨嘅蔡耀昌到東涌南參選，尋日仲到白鴿黨「老鴿」何俊仁（AV仁）嘅律師行踩場，鬧爆AV仁等人偏私，「以元老威權壓頂」咁話。
傘兵不滿東涌撞區 鬧爆蔡耀昌
話說二○一五年區議會選舉，「傘兵」王進洋喺離島區議會東涌南選區同民建聯周浩鼎（阿鼎）對撼。雖然最後阿鼎取得二千一百多票，以二百四十四票之差當選，但王進洋未有被打沉，更打算捲土重來。不過，最近有傳AV仁黨友、民主動力執委會委員蔡耀昌有意空降東涌南參選，同王進洋撞區。如果兩人一同出選，就真係鷸蚌相爭，分分鐘分薄票源，建制派就漁人得利喇。
鳩嗚團踩場抗議 斥元老威權壓頂
一班鳩嗚團成員尋日就踩上當年有份發起民主動力嘅AV仁律師行抗議，鬧爆蔡耀昌唔理同「傘兵」撞區出選，民主動力已淪為大黨派嘅分餅仔機器，係元老威權壓頂，以大欺小，又擔心最終分薄票源，益咗建制派。佢哋一行六人高舉寫有「民主動力，濫權霸道」、「民主動力、協調偏頗」嘅示威牌，喺中環遊行至AV仁嘅律師行，要求AV仁將表達佢哋不滿嘅信件轉交畀趙家賢，但AV仁就冇現身。
因為一眾鳩嗚團成員被拒進入律師行，雙方擾攘咗一輪，仲發生口角添，最後鳩嗚團嘅代表錢寶芬擺低封信畀律師行職員就離開。
當初民主動力前召集人鄭宇碩退下火線，由「乳鴿」趙家賢接手召集人職務，外界已經質疑有利益衝突，擔心白鴿黨會藉民主動力操控選舉。如今民主動力落得欠公信力、濫權霸道嘅污名，如果唔撤換番啲無黨派嘅人做召集人，睇怕都幾難服眾。