中環出更：沙田地頭蟲 張宇人 林卓廷鬥熟路
立法會財務委員會尋日開會，審議涉及一億九百七十萬元嘅大圍街市裝設空氣調節系統工程。飲食界立法會議員張宇人（Tommy）同另一位議員林卓廷（阿廷）都係沙田居民，佢哋兩個仲喺會上鬥熟路添！
激辯「五分鐘行到街市」
因應有關工程，大圍街市需要暫時封閉。Tommy就話，因為要陪老婆買餸，所以間中都會去大圍街市，覺得大圍街市暫時封閉對附近居民影響唔大，因為只要行多五分鐘就有屋邨街市。
阿廷就反駁，話自己有辦事處喺美林邨，要跑步先可以五分鐘去到，直言想睇張宇人行一次，仲話如果真係五分鐘行到就服咗佢喎。阿廷又話，如果日後街坊改搭小巴去其他街市，就會令車站排長龍情況更嚴重，質疑Tommy少搭小巴，唔知有幾多人。
Tommy再次顯示地頭蟲本色，教路用八爪魚天橋去美林邨，唔落雨就可以五分鐘去到。至於小巴佢就話從未試過等多過兩部車，仲話自己夠環保，叫阿廷唔好以為佢有私家車就唔搭小巴，仲豪言搭小巴搭得多過阿廷好多喎。
財委會最後通過有關工程，以及財經事務及庫務局申請保留兩個編外職位，並開設一首長級丙級政務官編外職位嘅建議。
卓妮